Аб цырымоніі ў гонар 80-годдзя вызвалення Браціславы
05.04.2025 г.У мемарыяльным комплексе «Славін» адбылася ўрачыстая цырымонія, прысвечаная 80-й гадавіне вызвалення сталіцы Славакіі ад нацысцкіх акупантаў.
У мерапрыемстве прынялі ўдзел Прэм’ер-міністр Роберт Фіца, члены ўрада, кіраўніцтва парламента, вядомыя дзеячы палітычных партый, дыпламатычнага корпусу і грамадскіх арганізацый. Рэспубліку Беларусь на цырымоніі прадставіў Пасол Беларусі ў Славакіі Андрэй Дапкюнас.
Цырымонія пачалася з урачыстага ўскладання вянкоў і кветак да цэнтральнага манумента комплексу «Славін». У афіцыйных выступленнях падкрэслівалася гістарычнае значэнне гэтай даты. Удзельнікі мерапрыемства адзначылі важнасць захавання памяці пра подзвіг воінаў-вызваліцеляў і неабходнасць супрацьстаяць спробам перапісаць гісторыю Другой сусветнай вайны.
Падчас размовы з Прэм’ер-міністрам Робертам Фіца пасол Беларусі выказаў удзячнасць кіраўніку ўрада за грамадзянскую мужнасць у абароне гістарычнай памяці пра подзвіг народаў Савецкага Саюза і Чырвонай Арміі.
4 красавіка 1945 года ўвайшло ў гісторыю як дзень вызвалення сталіцы Славакіі ад фашысцкіх захопнікаў. У ходзе Браціслаўска-Брноўскай наступальнай аперацыі войскі 2-га Украінскага фронту пад камандаваннем маршала Савецкага Саюза Радыёна Маліноўскага ўзялі горад штурмам. Бітвы працягваліся два дні, але, нягледзячы на ўпартае супраціўленне праціўніка, савецкія салдаты прынеслі Браціславе доўгачаканае вызваленне.
У мемарыяльным комплексе «Славін» пахаваныя 6845 чырвонаармейцаў, якія загінулі ў баях за вызваленне Браціславы. Цэнтральным элементам мемарыяла з'яўляецца велічны абеліск, на вяршыні якога ўсталяваная статуя савецкага салдата са сцягам.
